Þorgerður H. Þorvaldsdóttir

Þorgerður H. Þorvaldsdóttir (1968–2020) var sjálfstætt starfandi kynja- og sagnfræðingur hjá ReykjavíkurAkademíunni. Rannsóknir Þorgerðar beindust einkum að jafnrétti í samtímanum, bæði kynjajafnrétti og jafnrétti í víðari skilningi. Hún rannsakaði einnig ólíkar kvenímyndir, þar með taldar líkamsímyndir og fegurð. Bók hennar og Báru Baldursdóttur, Krullað og klippt. Aldarsaga háriðna á Íslandi, var tilnefnd til Fjöruverðlaunanna 2019.

 

Bækur eftir höfund

Ragnheiður Kristjánsdóttir

Ragnheiður Kristjánsdóttir (f. 1968) er prófessor í sagnfræði við Háskóla Íslands. Meðal verka hennar er bókin Nýtt fólk. Þjóðerni og íslensk verkalýðsstjórnmál 1901–1944, sem kom út árið 2008. Í rannsóknum sínum hefur hún einkum fengist við hugmynda- og stjórnmálasögu 19. og 20. aldar, nánar tiltekið sögu vinstri hreyfingarinnar, þróun lýðræðis og nú síðast kvenna- og kynjasögu.

Ragnheiður sat í stjórn Sögufélags á árunum 2001–2007. 

Bækur eftir höfund

Erla Hulda Halldórsdóttir

Erla Hulda Halldórsdóttir (f. 1966) er prófessor í sagnfræði við Háskóla Íslands og lauk doktorsprófi frá sama skóla árið 2011. Rannsóknir hennar hverfast um kvenna- og kynjasögu, einkum sögu 19. og 20. aldar. Jafnframt hefur hún rannsakað sagnaritun og aðferða- og heimildafræði, ekki síst með tilliti til sendibréfa fyrri tíma og fræðilegra ævisagna. Bók hennar, Nútímans konur. Menntun kvenna og mótun kyngervis á Íslandi 1850–1903, kom út árið 2011.

Erla Hulda var ritstjóri Sögu 2017–2018 og sat í stjórn Sögufélags 2006–2009.

Bækur eftir höfund

Landsnefndin komin á frímerki

Nýverið var tilkynnt að útgáfu nýrra íslenskra frímerkja væri hætt. Ellefu frímerki komu út þann 29. október síðastliðinn og voru það síðustu frímerkin sem munu koma út. Sú staðreynd er auðvitað sorgleg en það gleður okkur þó að greina frá því að á meðal þeirra var frímerki Landsnefndarinnar fyrri, þar sem innsiglum nefndarinnar bregður fyrir. 

Fimmta bindi landsnefndarskjalanna kom út um daginn, og það má sem fyrr panta með frírri heimsendingu í vefverslun okkar. 

Konur sem kjósa á ferð og flugi

Höfundar Kvenna sem kjósa hafa verið til viðtals í hinum ýmsu fjölmiðlum síðustu daga. Langt og ítarlegt viðtal má finna í Hugvarpi – hlaðvarpi Hugvísindasviðs Háskóla Íslands, Morgunvakt Rásar 1 fékk þær í heimsókn og  í dag, þriðjudaginn 10. nóvember, taka þær þátt í Kynjaþingi á vegum Kvenréttindafélags Íslands. 

Konur sem kjósa má sem fyrr kaupa með ókeypis heimsendingu hér í vefverslun félagsins. 

Áslaug Sverrisdóttir á Hringbraut og Rás 1

Handa á mill – Heimilisiðnaðarfélag Íslands 1913–2013 eftir Áslaugu Sverrisdóttur kom út þann 29. október síðastliðinn. Gaman er að segja frá því að höfundurinn var til viðtals á Hringbraut í þættinum Saga og samfélag hjá Birni Jóni Bragasyni í síðustu viku. Þá fór Áslaug jafnframt í áhugavert viðtal í Víðsjá á Rás 1 fyrir skömmu. 

Sem fyrr má kaupa Handa á milli með ókeypis heimsendingu í vefverslun Sögufélags. 

Lokað á skrifstofu Sögufélags til 17. nóvember

Skrifstofa Sögufélags á Dyngjuvegi er áfram lokuð fram til 17. nóvember þegar ný tilmæli um sóttvarnir verða birt. Áfram er þó hægt að sækja til okkar bækur eftir samkomulagi, best er að senda okkur póst í sogufelag@sogufelag.is eða hringja í 781-6400.
 
Við bendum á netverslunina á www.sogufelag.is en þar er hægt að panta nýjustu bækurnar með heimsendingartilboði.
 

Forsölutilboði lýkur á miðnætti á miðvikudag

Undanfarið hafa nýjar bækur Sögufélags verið á forsölutilboði hér í vefversluninni með heimsendingu í kaupbæti. Konur sem kjósa: Aldarsaga, Handa á milli: Heimilisiðnaðarfélag Íslands í hundrað ár, Í fjarska norðursins: Ísland og Grænland – viðhorfasaga í þúsund ár og Landsnefndin fyrri 1770-1771 V eru allar á tilboði fram til miðnættis miðvikudaginn 4. nóvember. Að því loknu munu kaupendur fá bækurnar heimsendar gjaldfrjálst.

Missið ekki af frábæru tilboði!

Landsnefndin fyrri – einstakt tilboð á öllu safninu

Í vefverslun Sögufélags er nú hægt að kaupa öll bindi Landsnefndarinnar fyrri 1770–1771 á sérstöku pakkatilboði. Fimmta bindið kom út í síðustu viku og munu kaupendur fá send fyrstu fimm bindin strax, en sjötta bindið verður sent til kaupenda um leið og það kemur út á næsta ári.

Heildarútgáfa á skjölum Landsnefndarinnar fyrri verður birt í sex bindum á árunum 2016–2021. Frumbréfin eru bæði á íslensku og dönsku eins og þau voru þegar þau voru send Landsnefndinni á sínum tíma. Flest íslensku bréfin voru þýdd á sínum tíma til notkunar fyrir nefndina af ritara hennar Eyjólfi Jónssyni. Íslensku bréfin sem bárust henni skömmu fyrir brottför af landinu voru þó aldrei þýdd, og er bætt úr því hér í tengslum við útgáfuna. Bókunum fylgja fræðilegar greinar, ítarlegar skýringar, nafna- og efnisorðaskrár. Allar greinar og skýringarefni er bæði á íslensku og dönsku.

Ritröðin á sér veglega vefsíðu, Landsnefndin.is

 

 

Í fjarska norðursins: Ísland og Grænland – Viðhorfasaga í þúsund ár. Höfundaspjall á fésbók.

Bókin Í fjarska norðursins: Ísland og Grænland – viðhorfasaga í þúsund ár eftir Sumarliða R. Ísleifsson er komin út hjá Sögufélagi og verður því fagnað miðvikudaginn 4. nóvember klukkan 17:00 með höfundaspjalli í Gunnarshúsi.
 
Í ljósi aðstæðna verður ekki hægt að hafa spjallið opið gestum heldur verður því streymt á fésbókarsíðu Sögufélags. Markús Þ. Þórhallsson, sagfræðingur og fréttamaður, ræðir við höfundinn Sumarliða og Margréti Tryggvadóttur, myndaritstjóra um þetta mikla verk.
 
Í fjarska norðursins er saga viðhorfa til Íslands og Grænlands frá miðöldum til samtímans. Báðar hafa þessar þjóðir verið framandi í augum annarra. Lengi voru ímyndir þeirra svipaðar en margt hefur líka greint á milli. Í bókinni er leitað svara við því hvers vegna íbúum þessara landa hefur ýmist verið lýst sem verstu villimönnum eða fyrirmyndarfólki. Af hverju hefur Íslandi og Grænlandi stundum verið lýst sem djöflaeyjum og stundum sem fjársjóðs- eða sælueyjum?