Uncategorized @is

Fyrstu heiðursfélagar Sögufélags

júlí 2019

Um þessar mundir stendur yfir athugun á þeim sem hafa verið gerðir að heiðursfélögum í Sögufélagi og má gera ráð fyrir því að tæmandi heiðursfélagalisti verði tilbúinn á haustdögum.

3. apríl 1917 eignaðist Sögufélag sína fyrstu heiðursfélaga. Þá voru Klemens Jónsson landritari, og Einar Arnórsson ráðherra gerðir að heiðursfélögum í Sögufélagi.

Kjörið hefur, ef marka má minningagrein um Einar, „staðið að einhverju leyti í sambandi við þá breytingu, er þá hafði nýlega orðið á stjórn landsins.“ Einar var nýhættur sem ráðherra Íslands og Klemens sem landritari þegar það embætti var lagt niður.

Klemens sat í stjórn Sögufélags 1906-1930. Einar 1910-1955 og var þar af forseti 1935-1955. Seta Einars í stjórn Sögufélags var því ekki hálfnuð þegar hann var gerður að heiðursfélaga.


Fréttir

Fréttabréf Sögufélags er komið út

júní 2019

Eftir langa bið hefur Sögufélag loksins sent frá sér nýtt fréttabréf.

Ýmislegt hefur drifið á daga félagsins síðan síðasta fréttabréf var sent út og það er því mikið að vöxtum. Smelltu hér til að lesa fréttabréfið.

Ef þú ert ekki á póstlistanum okkar þá geturðu skráð þig á hann hér.


Fréttir

Sögukvöld framundan!

maí 2019

Fimmtudagskvöldið 30. maí kl. 20:00 verður útgáfu vorheftis Sögu 2019 fagnað í Gunnarshúsi, Dyngjuvegi 8. Þar gefst tækifæri til að spjalla um efni tímaritsins en höfundar þriggja greina munu kynna viðfangsefni sín.

Erla Hulda Halldórsdóttir kynnir grein sína „Sögulegir gerendur og aukapersónur. Kyngervi og sagnaritun þjóða(r)“.

Íris Ellenberger, Hafdís Erla Hafsteinsdóttir og Ásta Kristín Benediktsdóttir kynna grein sína um forsíðumynd Sögu, „Meira en þúsund orð. Ljósmyndun og rómantísk vinátta við upphaf 20. aldar“.

Anna Agnarsdóttir ræðir framlag sitt til álitamála Sögu, sem að þessu sinni hafa yfirskriftina „Ísland – Danmörk: Síkvik söguleg tengsl“.

Tímaritið  verður að sjálfsögðu til sölu á staðnum og boðið verður upp á léttar veitingar.


Fréttir

Sagnaritun kvenna, mannvíg og deilur um vöruflutninga: vorhefti Sögu er þrungið efni!

maí 2019

Vorhefti tímaritsins Sögu 2019 er nú á leið til áskrifenda sinna. Þar kennir að venju ýmissa grasa. Þrjár ritrýndar greinar eru í heftinu: Erla Hulda Halldórsdóttir skrifar um sagnaritun íslenskra kvenna fyrir tíma akademískrar kvennasögu, Árni Daníel Júlíusson fjallar um mannvíg og morð á Íslandi frá fimmtándu öld til sautjándu aldar og Arnór Gunnar Gunnarsson skrifar um Rainbow Navigation-málið svokallaða sem átti sér stað um miðjan níunda áratug síðustu aldar og snerist um vöruflutninga fyrir varnarliðið.

Í „Álitamálum“ Sögu að þessu sinni fjalla fjórir íslenskir og danskir fræðimenn um söguleg tengsl Íslands og Danmerkur. Anna Dröfn Ágústsdóttir og Guðbrandur Benediktsson veita lesendum innsýn í vinnu við nýja grunnsýningu Sjóminjasafnsins í Reykjavík og Marjatta Ísberg skrifar viðhorfsgrein um sögu líkklæða á Íslandi.

Í þættinum „Úr skjalaskápnum“ dregur Jóhanna Þ. Guðmundsdóttir fram athyglisverða uppboðsskrá frá Viðey. Auk þess er að finna í heftinu ellefu ritdóma um nýleg sagnfræðiverk og eina athugasemd við ritdóm.

Kápuna prýðir mynd af tveimur samstarfskonum á reykvískri ljósmyndastofu um 1910 og skrifa Íris Ellenberger, Hafdís Erla Hafsteinsdóttir og Ásta Kristín Benediktsdóttir pistil um myndina þar sem þær setja hana í samhengi við hugmyndir um rómantíska vináttu kvenna.

Útgáfu vorheftis Sögu verður fagnað í Gunnarshúsi við Dyngjuveg fimmtudagskvöldið 30. maí en nánari dagskrá verður auglýst síðar.

Loks má minna á að ritstjórar eru alltaf á höttunum eftir spennandi efni. Fræðimenn sem vinna að athyglisverðum rannsóknum á sviði íslenskrar sögu eru hvattir að senda inn greinar í Sögu, á vilhelmv@hi.is eða kristinsvava@gmail.com.


Fréttir

Lögum breytt á aðalfundi Sögufélags

maí 2019

Vel heppnaður og ágætlega sóttur aðalfundur Sögufélags var haldinn 29. apríl síðastliðinn.  Helstu tíðindi fundarins eru þau að Íris Ellenberger og Gunnar Þór Bjarnason luku sínum stjórnarstörfum eftir sex ára farsæla setu. Þeim eru þökkuð góð störf í þágu félagsins. Hrefna Róbertsdóttir var endurkjörin forseti félagsins og Sumarliði Ísleifsson og Helga Maureen Gylfadóttir eru nýtt stjórnarfólk.

Þau þrjú skipa nýja sjö manna stjórn félagsins ásamt Brynhildi Ingvarsdóttur, Hjalta Hugasyni, Markúsi Þ. Þórhallssyni og Erni Höskuldssyni. Eftir lagabreytingu sem einnig var samþykkt á aðalfundinum eru allir í stjórn aðalmenn í stað þess að tveir af sjö voru varamenn áður.

Góður rómur var gerður að ársskýrslum forseta og gjaldkera og ljóst að tekist hefur að koma rekstri Sögufélags á mjög ákjósanlega braut líkt og metnaðarfull bókaútgáfa og önnur starfsemi liðinna ára er til marks um.

Að loknum venjulegum aðalfundarstörfum hélt Kristín Svava bráðskemmtilegt erindi „Að horfast í augu við hið sóðalega og grófa. Stund klámsins og aðferðir við ritun íslenskrar klámsöguum“. Þar fjallaði hún um tilurð bókarinnar Stund Klámsins. Klám á Íslandi á tímum kynlífsbyltingarinnar. Afar áhugaverðar umræður sköpuðust eftir að Kristín Svava lauk máli sínu enda virtist Erlu Huldu Halldórsdóttur fundarstjóra þvert um geð að þurfa að slíta fundi.


Fréttir

Aðalfundur Sögufélags 2019

apríl 2019

Aðalfundur Sögufélags verður haldinn mánudaginn 29. apríl kl. 18-19 í húsakynnum Sögufélags á Dyngjuvegi 8. Á dagskrá eru venjuleg aðalfundarstörf.

Ein lagabreyting verður lögð fram á fundinum:

8. grein skv. núgildandi lögum:

  1. grein.

Kjör stjórnar og skoðunarmanna reikninga

Fyrir Sögufélagi ræður stjórn fimm aðalmanna og tveggja varamanna kjörinna á aðalfundi. Forseti skal kjörinn sérstaklega til tveggja ára í senn og má endurkjósa hann fjórum sinnum. Aðrir aðalmenn og báðir varamenn skulu kjörnir til eins árs í senn og mega þeir eigi sitja lengur en sex ár samfellt í stjórn. Skulu aðalmenn kjörnir fyrst og síðan varamenn. Auk þess skal kjósa tvo skoðunarmenn reikninga félagsins og einn til vara. Fyrsta stjórnarfund skal halda svo fljótt sem verða má eftir aðalfund. Skulu þá kjörnir ritari/skjalavörður gjaldkeri og kynningarstjóri úr hópi aðalmanna.

Stjórn leggur til að greinin verði eftirfarandi:

  1. grein.

Kjör stjórnar og skoðunarmanna reikninga

Fyrir Sögufélagi ræður sjö manna stjórn sem kjörin er á aðalfundi. Forseti skal kjörinn sérstaklega til tveggja ára í senn og má endurkjósa hann fjórum sinnum. Aðrir stjórnarmenn skulu kjörnir til eins árs í senn og mega þeir eigi sitja lengur en sex ár samfellt í stjórn. Auk þess skal kjósa tvo skoðunarmenn reikninga félagsins og einn til vara. Fyrsta stjórnarfund skal halda svo fljótt sem verða má eftir aðalfund. Skulu þá kjörnir ritari/skjalavörður, gjaldkeri og kynningarstjóri úr hópi stjórnarmanna.

Í framhaldi af aðalfundinum kl. 19.30-20:30 mun Kristín Svava Tómasdóttir segja frá nýjustu bók sinni Stund klámsins. Klám á Íslandi á tímum kynlífsbyltingarinnar. Erindi hennar heitir:

Að horfast í augu við hið sóðalega og grófa. Stund klámsins og aðferðir við ritun íslenskrar klámsögu“.

Bókin hlaut viðurkenningu Hagþenkis 2018 og var í öðru sæti í vali starfsfólks bókaverslana á bók ársins í flokki fræðirita.

Viðburðirnir eru óháðir hver öðrum þannig að menn geta mætt á annan þeirra eða báða, eftir því sem hugur stendur til.

Stjórnin


Eldri Fréttir