Guðmundur Jónsson

Guðmundur Jónsson (f. 1955) er prófessor í sagnfræði við Háskóla Íslands. Hann er með doktorspróf frá London School of Economics (1992) og hafa rannsóknir hans einkum legið á sviði félags- og hagsögu Íslands á 19. og 20. öld, en auk þess hefur hann rannsakað neyslu- og matarsögu síðari alda. Guðmundur sat í stjórn Sögufélags á árunum 1984-1987 og 1996-1997, og var ritstjóri Sögu 1995-2002. Hann hefur ritstýrt tveimur greinasöfnum fyrir Sögufélag, Frjálsu og fullvalda ríki og Nýju Helgakveri

 

Bækur eftir höfund

Guðni Th. Jóhannesson

Guðni Th. Jóhannesson (f. 1968) er forseti Íslands og prófessor (í leyfi) við Háskóla Íslands. Hann er með doktorspróf frá Queen Mary-háskóla í London (2003) og hafa rannsóknir hans aðallega beinst að stjórnmálasögu Íslands á 20. og 21 .öld. Guðni var forseti Sögufélags árin 2011-2015 og varamaður í stjórn 2015-2016. Árið 2016 kom bók hans, Fyrstu forsetarnir, út í smáritaröð Sögufélags. 

Bækur eftir höfund

Gunnar Benediktsson

Gunnar Benediktsson var þjóðkunnur rithöfundur og prestur. Eftir hann liggja skáldsögur, leikrit, ritgerðasöfn, sagnfræðirit og endurminningar. Skömmu áður en Gunnar lést, 1981, hafði hann lokið við að rita ævisögu Odds frá Rósuhúsi, sem Sögufélag gaf út árið 1982. 

Bækur eftir höfund

Gunnar Þór Bjarnason

Gunnar Þór Bjarnason fæddist á Ísafirði 1957. Hann varð stúdent frá Menntaskólanum í Reykjavík, lauk BA-prófi frá í sagnfræði og þýsku frá Háskóla Íslands, MA-prófi í alþjóðasamskiptum frá sama skóla og stundaði framhaldsnám í sagnfræði í Þýskalandi. Hann kenndi í mörg ár við Fjölbrautaskólann í Breiðholti og hefur lengi verið stundakennari við Háskóla Íslands.

Gunnar Þór hefur sinnt ýmsum félags- og útgáfustörfum innan sagnfræðinnar; var annar stofnenda Sagna, ritstýrði Nýrri sögu  um hríð og sat í stjórn Félags sögukennara, var formaður Félags um átjándu aldar fræði í fjögur ár og sat í stjórn Sögufélags.

Gunnar Þór hlaut íslensku bókmenntaverðlaunin í flokki fræðibóka og rita almenns efnis árið 2015 fyrir bókina Þegar siðmenningin fór fjandans til. Íslendingar og stríðið mikla 1914-1918.

Bækur eftir höfund

Haraldur Bernharðsson

Haraldur Bernharðsson (f. 1968) er dósent í íslenskum miðaldafræðum við Háskóla Íslands og doktor í málvísindum frá Cornell-háskóla (2001). Hann var einn þriggja ritstjóra Járnsíðu og Kristniréttar Árna Þorlákssonar sem kom út í smáritaröð Sögufélags árið 2005. 

Bækur eftir höfund

Helgi Skúli Kjartansson

Helgi Skúli Kjartansson (f. 1949) er prófessor emeritus í sagnfræði við Háskóla Íslands. Hann lauk cand. mag. prófi í sagnfræði frá HÍ árið 1976 en stundar nú doktorsnám í íslenskum bókmenntum við sama skóla. Rannsóknasvið Helga er fjölbreytt og spannar allt frá landnámi Íslands til vesturferða og sögu Íslands á 20. öld. Í gegnum tíðina hefur Helgi Skúli unnið mikið og óeigingjarnt starf fyrir Sögufélag og á 70 ára afmæli hans, árið 2019, kom út afmælisritið Nýtt Helgakver, greinasafn til heiðurs honum.

 

Bækur eftir höfund

Hjalti Snær Ægisson

Hjalti Snær Ægisson (f. 1981) er doktor í bókmenntafræði frá Háskóla Íslands (2019). Hann ritstýrði, ásamt Aðalgeir Kristjánssyni, bréfaskiptum Gríms Thomsens og Brynjólfs Péturssonar sem komu út í smáritaröð Sögufélags árið 2011.   

Bækur eftir höfund

Hrefna Róbertsdóttir

Hrefna Róbertsdóttir (f. 1961) er doktor í sagnfræði frá Háskólanum í Lundi (2008). Doktorsritgerð Hrefnu fjallaði um efnahagsstefnu danskra stjórnvalda gagnvart Íslandi á 18. öld og hafa rannsóknir hennar einkum beinst að sögu Íslands á því tímabili. Hrefna var skipuð þjóðskjalavörður í mars 2019 og er hún fyrst kvenna til þess að gegna því starfi. Sögufélag gefur út ritröðina Landsnefndin fyrri 1770-1771 ásamt Þjóðskjalasafni Íslands og er Hrefna ritstjóri þeirrar útgáfu ásamt Jóhönnu Þ. Guðmundsdóttur. Hrefna var ritstjóri Sögu 2002-2006 og frá árinu 2015 hefur hún verið forseti Sögufélags. 

 

Bækur eftir höfund

Jakob Benediktsson

Jakob Benediktsson (1907-1999) var fornfræðingur, forstöðumaður Orðabókar Háskólans, ritstjóri Tímarits Máls og menningar og meðritstjóri fyrir Íslands hönd að Kulturhistorisk leksikon for nordisk middelalder. Hann var afkastamikill fræðimaður, vann mikið þýðingarstarf og gaf út fjölda grundvallarrita um sögu Íslands. Samhliða störfum sínum fyrir Orðabók Háskólans hélt Jakob úti þáttunum Íslenskt mál í Ríkisútvarpinu sem nutu mikilla vinsælda. 

Bækur eftir höfund