Ragnheiður Kristjánsdóttir

Ragnheiður Kristjánsdóttir (f. 1968) er prófessor í sagnfræði við Háskóla Íslands. Meðal verka hennar er bókin Nýtt fólk. Þjóðerni og íslensk verkalýðsstjórnmál 1901–1944, sem kom út árið 2008. Í rannsóknum sínum hefur hún einkum fengist við hugmynda- og stjórnmálasögu 19. og 20. aldar, nánar tiltekið sögu vinstri hreyfingarinnar, þróun lýðræðis og nú síðast kvenna- og kynjasögu.

Ragnheiður sat í stjórn Sögufélags á árunum 2001–2007. 

Bækur eftir höfund

Sigurjón Björnsson

Sigurjón Björnsson (f. 1926) var prófessor í sálarfræði við Háskóla Íslands árin 1971-1994. Hann hefur gefið út fjölda rita um sálfræði, bæði frumsamin og þýdd, en síðustu ár hefur hann einna helst starfað við þýðingar. Sögufélag hefur gefið út tvær þýðingar Sigurjóns á forn-grískum sagnfræðiritum: Sögu Pelópseyjarstríðsins eftir Þúkýdídes og Helleníku eftir Xenófón. 

 

Bækur eftir höfund

Smári Geirsson

Smári Geirsson

Smári Geirsson (f. 1951) stundaði nám í þjóðfélagsfræðum við Háskóla Íslands og lauk B.A. prófi 1976. Síðan lá leiðin í Háskólann í Björgvin í Noregi þar sem hann nam stjórnsýslufræði og lauk prófi 1971. Námi í uppeldis- og kennslufræðum við Háskóla Íslands lauk hann 1980.

Smári hefur fengist við kennslu og ritstörf og var skólameistari Verkmenntaskóla Austurlands í Neskaupstað 1983-1987. Þá átti hann sæti í bæjarstjórn Neskaupstaðar og síðar Fjarðarbyggðar í 28 ár. Smári hefur samið bækur og fjölda greina um austfirska sögu.

Bækur eftir höfund

Steinunn Kristjánsdóttir

Steinunn Kristjánsdóttir

Steinunn Kristjánsdóttir er prófessor í fornleifafræði við Háskóla Íslands og Þjóðminjasafn Íslands. Árið 2012 gaf Sögufélag út bók hennar um Skriðuklaustur í Fljótsdal. Bókin hlaut Fjöruverðlaunin fyrir bækur í flokki fræðirita og var tilnefnd til Viðurkennningar Hagþenkis og Íslensku bókmenntaverðlaunanna.

Bækur eftir höfund

Sumarliði R. Ísleifsson

Sumarliði R. Ísleifsson (f.  1955) er lektor í hagnýtri menningarmiðlun við Háskóla Íslands og lauk doktorsprófi frá sömu stofnun árið 2014. Hann var sjálfstætt starfandi sagnfræðingur innan ReykjavíkurAkademíunnar 1998–2012, og hefur ritað og ritstýrt fjölda bóka um sagnfræði. Árið 2020 kom bók hans, Í fjarska norðursins. Ísland og Grænland – viðhorfasaga í þúsund ár, út hjá Sögufélagi og hlaut hún Íslensku bókmenntaverðlaunin það árið. 

Bækur eftir höfund

Sverrir Jakobsson

Sverrir Jakobsson (f. 1970) er prófessor í sagnfræði við Háskóla Íslands. Rannsóknasvið Sverris hefur einkum verið íslensk miðaldasaga en doktorsritgerð hans fjallaði um heimsmynd Íslendinga og íslenskt þjóðerni á miðöldum. Sverrir sat í stjórn Sögufélags, fyrst sem varamaður en svo meðstjórnandi, á árunum 2011-2017.

 

Bækur eftir höfund

Unnur Birna Karlsdóttir

Unnur Birna Karlsdóttir (f. 1964) lauk doktorsprófi í sagnfræði frá Háskóla Íslands árið 2010. Hún hefur sent frá sér ýmis fræðirit og fræðigreinar um samband manna og náttúru á Íslandi. Rannsóknin á sögu hreindýra á Íslandi er stærsta verk hennar á því sviði hingað til.

Unnur Birna er forstöðumaður Rannsóknaseturs Háskóla Íslands á Austurlandi.

 

Bækur eftir höfund

Vilhelm Vilhelmsson

Vilhelm Vilhelmsson (f. 1980) er forstöðumaður rannsóknarstofnunar Háskóla Íslands á norðurlandi vestra. Vilhelm er doktor í sagnfræði frá Háskóla Íslands og fjallaði doktorsritgerð hans um vistarband á Íslandi á 19. öld. Hann hefur einnig lagt fyrir sig rannsóknir á sögu íslenskra vesturfara og aðlögun þeirra að kanadísku samfélagi í lok 19. aldar ásamt hugmynda- og hugarfarssögu 19. aldar. Vilhelm er annar tveggja ritstjóra Sögu, tímarits Sögufélags.

Bækur eftir höfund

Þorgerður H. Þorvaldsdóttir

Þorgerður H. Þorvaldsdóttir (1968–2020) var sjálfstætt starfandi kynja- og sagnfræðingur hjá ReykjavíkurAkademíunni. Rannsóknir Þorgerðar beindust einkum að jafnrétti í samtímanum, bæði kynjajafnrétti og jafnrétti í víðari skilningi. Hún rannsakaði einnig ólíkar kvenímyndir, þar með taldar líkamsímyndir og fegurð. Bók hennar og Báru Baldursdóttur, Krullað og klippt. Aldarsaga háriðna á Íslandi, var tilnefnd til Fjöruverðlaunanna 2019.

 

Bækur eftir höfund