Konur sem kjósa hlýtur evrópsk hönnunarverðlaun!

Snæfríð Þorsteinsdóttir og Hildigunnur Gunnarsdóttir hlutu gullverðlaun Art Directors Club Europe fyrir hönnun sína á Konur sem kjósa. FÍT, Félag íslenskra teiknara, er aðili að ADCE en fremstu verk hvers lands eru send í keppnina sem svo eru dæmd af 53 fagaðilum frá 19 löndum í Evrópu. Konur sem kjósa hreppti gullið í flokknum Editorial design. 

Þetta eru önnur gullverðlaunin sem Snæfríð og Hildigunnur hljóta fyrir hönnun sína á Konur sem kjósa, en fyrr á árinu fékk bókin jafnframt gullverðlaun FÍT í flokknum bókahönnun. Bókin var jafnframt tilnefnd til Hönnunarverðlauna Íslands á dögunum.

Sögufélag þakkar kærlega samstarfið og óskar Snæfríð, Hildigunni og samstarfsfólki þeirra innilega til hamingju með viðurkenninguna!

Kristjana Vigdís tilnefnd til Íslensku bókmenntaverðlaunanna

Kristjana Vigdís Ingvadóttir hlýtur tilnefningu til Íslensku bókmenntaverðlaunanna í ár fyrir bók sína, Þrautseigja og mikilvægi íslenskrar tungu. Á vef Vísis kemur fram að Kristjana sé yngsti höfundur sem tilnefndur hefur verið í flokki fræðibóka, en hún er 28 ára.

Rökstuðningur dómnefndar:

„Höfundur leitar svara við nokkrum spurningum, m.a. hversu víðtæk var notkun dönskunnar á 18. og 19. öld á Íslandi, hvar bar hana helst niður og hvers vegna ekki var skipt yfir í dönsku eins og rektor einn lagði til? Höfundur setur frumrannsókn sína í samhengi við fyrri rannsóknir fræðimanna á einstaklega skipulegan og ferskan hátt. Virðing Dana fyrir menningararfi Íslendinga kemur ef til vill einna helst á óvart. Í lok bókar spyrðir höfundur áhyggjum fyrri alda varðandi íslenskt mál saman við þær sem tilheyra deginum í dag. Hressandi lesning.“


Sögufélag óskar Kristjönu Vigdísi innilega til hamingju með tilnefninguna.