FRÉTTIR

Aðalfundur Sögufélags verður haldinn mánudaginn 29. apríl kl. 18-19 í húsakynnum Sögufélags á Dyngjuvegi 8. Á dagskrá eru venjuleg aðalfundarstörf.

Ein lagabreyting verður lögð fram á fundinum:

8. grein skv. núgildandi lögum:

  1. grein.

Kjör stjórnar og skoðunarmanna reikninga

Fyrir Sögufélagi ræður stjórn fimm aðalmanna og tveggja varamanna kjörinna á aðalfundi. Forseti skal kjörinn sérstaklega til tveggja ára í senn og má endurkjósa hann fjórum sinnum. Aðrir aðalmenn og báðir varamenn skulu kjörnir til eins árs í senn og mega þeir eigi sitja lengur en sex ár samfellt í stjórn. Skulu aðalmenn kjörnir fyrst og síðan varamenn. Auk þess skal kjósa tvo skoðunarmenn reikninga félagsins og einn til vara. Fyrsta stjórnarfund skal halda svo fljótt sem verða má eftir aðalfund. Skulu þá kjörnir ritari/skjalavörður gjaldkeri og kynningarstjóri úr hópi aðalmanna.

Stjórn leggur til að greinin verði eftirfarandi:

  1. grein.

Kjör stjórnar og skoðunarmanna reikninga

Fyrir Sögufélagi ræður sjö manna stjórn sem kjörin er á aðalfundi. Forseti skal kjörinn sérstaklega til tveggja ára í senn og má endurkjósa hann fjórum sinnum. Aðrir stjórnarmenn skulu kjörnir til eins árs í senn og mega þeir eigi sitja lengur en sex ár samfellt í stjórn. Auk þess skal kjósa tvo skoðunarmenn reikninga félagsins og einn til vara. Fyrsta stjórnarfund skal halda svo fljótt sem verða má eftir aðalfund. Skulu þá kjörnir ritari/skjalavörður, gjaldkeri og kynningarstjóri úr hópi stjórnarmanna.

Í framhaldi af aðalfundinum kl. 19.30-20:30 mun Kristín Svava Tómasdóttir segja frá nýjustu bók sinni Stund klámsins. Klám á Íslandi á tímum kynlífsbyltingarinnar. Erindi hennar heitir:

Að horfast í augu við hið sóðalega og grófa. Stund klámsins og aðferðir við ritun íslenskrar klámsögu“.

Bókin hlaut viðurkenningu Hagþenkis 2018 og var í öðru sæti í vali starfsfólks bókaverslana á bók ársins í flokki fræðirita.

Viðburðirnir eru óháðir hver öðrum þannig að menn geta mætt á annan þeirra eða báða, eftir því sem hugur stendur til.

Stjórnin

Í framhaldi af aðalfundi Sögufélags mánudaginn 29. apríl næstkomandi, mun Kristín Svava Tómasdóttir segja frá nýjustu bók sinni Stund klámsins. Klám á Íslandi á tímum kynlífsbyltingarinnar. Erindi hennar hefst kl. 19:30 heitir:

„Að horfast í augu við hið sóðalega og grófa. Stund klámsins og aðferðir við ritun íslenskrar klámsögu“.

Bókin Stund klámsins. Klám á Íslandi á tímum kynlífsbyltingarinnar eftir Kristínu Svövu Tómasdóttur, sem út kom hjá Sögufélagi á liðnu ári, fjallar um það hvernig klám var skilgreint á Íslandi á sjöunda og áttunda áratug 20. aldar. Það voru tímar mikillar gerjunar í hugmyndum um kynhvatir, kynlíf og menningarlegar birtingarmyndir þess. Þar á meðal fór fram lífleg umræða um mörk þess sem kallað var klám. Ein af meginniðurstöðum bókarinnar er hins vegar að þrátt fyrir breyttar hugmyndir um réttmæti kynferðislegra sviðsetninga hafi klámhugtakið sjálft haldið sinni neikvæðu merkingu og jafnan verið gripið til þess til að lýsa því sem þótti sóðalegt og gróft, ljótt og vont. Í erindinu mun Kristín Svava fjalla um áskoranir og aðferðafræði við rannsóknir á þessu fordæmda og gildishlaðna viðfangsefni.

Kristín Svava Tómasdóttir útskrifaðist með MA-próf í sagnfræði frá Háskóla Íslands árið 2014. Fyrir Stund klámsins hlaut hún Viðurkenningu Hagþenkis og lenti í öðru sæti bóksalaverðlaunanna 2018 í flokki fræðirita.

Erla Hulda Halldórsdóttir dósent í sagnfræði hefur verið annar af ritstjórum SÖGU síðastliðin tvö ár, en hún og Vilhelm Vilhelmsson forstöðumaður rannsóknarseturs Háskóla Íslands á Norðurlandi vestra tóku við ritstjórn SÖGU í ársbyrjun 2016. Hún ritstýrði farsællega fjórum heftum af tímaritinu en hefur nú látið af þeim störfum.

Tímaritið SAGA hefur verið kröftugt þessi ár, blanda af fræðilegum greinum, viðhorfum, andmælum og ritdómum. Áhersla hefur einnig verið lögð á að birta bálka um álitamál sem tengjast samtímaumræðu. Þannig tengist fortíðin og nútíðin. Við ritstjórasæti Erlu Huldu tekur Kristín Svava Tómasdóttir sjálfstætt starfandi sagnfræðingur, sem verður ritstjóri næstu tvö árin ásamt Vilhelm.

SAGA er einn mikilvægasti vettvangur fræðilegrar umræðu um íslenska sagnfræði þar sem öll tímabil og tegundir sögu eiga sinn sess. Tímaritið kemur út tvisvar á ári. Erlu Huldu Halldórsdóttur er hér með þakkað kærlega fyrir öfluga og styrka ritstjórn og Kristín Svava Tómasdóttir nýr ritstjóri boðin hjartanlega velkomin!

Bókakvöld verður haldið miðvikudagskvöldið 3. apríl kl. 20:00 í sal ReykjavíkurAkademíunnar í Þórunnartúni 2, 4. hæð. Þar verður fjallað og spjallað um fimm spennandi sagnfræðiverk sem komu út á liðnu ári. Bókakvöldið er skipulagt í samvinnu Sagnfræðingafélags Íslands, tímaritsins Sögu, Sögufélags og ReykjavíkurAkademíunnar.

Dagskráin verður sem hér segir:

Kristín Ástgeirsdóttir fjallar um bók Báru Baldursdóttur og Þorgerðar H. Þorvaldsdóttur, Krullað og klippt. Aldarsaga háriðna á Íslandi (Hið íslenska bókmenntafélag)

Hjalti Hugason fjallar um bók Sverris Jakobssonar, Kristur. Saga hugmyndar (Hið íslenska bókmenntafélag)

Þorgerður H. Þorvaldsdóttir fjallar um bók Kristínar Svövu Tómasdóttur, Stund klámsins. Klám á Íslandi á tímum kynlífsbyltingarinnar (Sögufélag)

Kaffihlé

Guðný Hallgrímsdóttir fjallar um bók Þórunnar Jörlu Valdimarsdóttur, Skúli fógeti. Faðir Reykjavíkur – saga frá 18. öld (JPV)

Ragnheiður Kristjánsdóttir fjallar um bók Gunnars Þórs Bjarnasonar, Hinir útvöldu. Sagan af því þegar Ísland varð sjálfstætt ríki árið 2018 (Sögufélag)

Allt sagnfræðiáhugafólk er hvatt til að fjölmenna á bókakvöldið.

Verðlaunaritið Stund klámsins. Klám á Íslandi á tímum kynlífsbyltingarinnar sem Sögufélag gefur út, verður til umfjöllunar á viðburði í risloftinu, Hannesarholti föstudaginn 5. apríl 2019 kl. 17. Þótt viðfangsefnið kunni að virðast viðkvæmt og jafnvel bannað börnum fer Kristín Svava Tómasdóttir þannig höndum um það að úr verður frábærlega læsilegt fræðirit.

Höfundurinn mun lesa úr bókinni og ræða efni hennar við Guðrúnu Elsu Bragadóttur bókmenntafræðing. Þar má búast við fjörlegum samræðum.

Allir eru velkomnir og aðgangur ókeypis!

Fyrir jólin 2018 gaf Sögufélag út bók Axels Kristinssonar, Hnignun, hvaða hnignun? Þar færði höfundur rök fyrir því að hugmyndin um hnignun og niðurlægingu í sögu Íslands sé pólitísk goðsögn ‒ mýta ‒ sem búin hafi verið til í sjálfstæðisbaráttunni á 19. öld og þjónað þörfum hennar með því að mála erlend yfirráð sem dekkstum litum.

Goðsögnin sannfærði Íslendinga um að dönsk stjórn hefði reynst þjóðinni ákaflega óheillavænleg og því bæri að stefna að sjálfstæði. Vitaskuld eru ekki allir á sama máli og Axel.

Því er efnt til málstofu á Hugvísindaþingi þar sem tekist verður á um þætti í röksemdafærslu hans með yfirskriftinni „Stefndi Ísland til Andskotans?“ Málstofan fer fram laugardaginn 9. mars kl. 15:00 til 16:30 í stofu 311 í Árnagarði.

Gunnar Þór Bjarnason stýrir umræðum milli málshefjenda, Axels Kristinssonar, Orra Vésteinssonar og Árna Daníels Júlíussonar.

Öllu áhugafólki um Íslandssöguna á eftir að finnast spennandi að fylgjast með og taka þátt í umræðum um þessar spennandi en umdeildu hugmyndir!

Eldri Fréttir