Klám og hnignun: tilnefningar til Viðurkenningar Hagþenkis

janúar 2019

Jón Yngvi Jóhannsson formaður Hagþenkis tilkynnti þann 23. janúar síðastliðinn að tvær af bókum Sögufélags væru tilnefndar til Viðurkenningar Hagþenkis. Það eru Stund klámsins eftir Kristínu Svövu Tómasdóttur og Hnignun, hvaða hnignun? eftir Axel Kristinsson.

Að áliti viðurkenningarráðs Hagþenkis myndar ögrandi söguskoðun Axels og eftirtektarverður frásagnarstíll öfluga heild. Ráðið lítur á bók Kristínar sem brautryðjandaverk um sögu kláms og kynverundar á Íslandi sem byggir á afhjúpandi rannsóknum á vandmeðförnu efni

Í viðurkenningaráðinu sitja einstaklingar af ólíkum fræðasviðum en það hóf störf um miðjan október. Ráðið er skipað Auði Styrkársdóttur, Ástu Kristínu Benediktsdóttur, Henry Alexander Henryssyni og Svanhildi Kr. Sverrisdóttir.

Umdeildur efniviður

Þau Kristín og Axel takast bæði á við umdeildan efnivið í rannsóknum sínum af mikilli vandvirkni og hugkvæmni. Bækur þeirra falla í flokk sem Sögufélag hefur á undanförnum árum lagt sig eftir að sinna: rannsóknum fræðimanna á minna þekktum viðfangsefnum sagnfræðinnar og samtímatengdum rannsóknarefnum.

Allt frá árinu 1986 hefur Hagþenkir veitt viðurkenningu fyrir fræðirit, námsgögn eða aðra miðlun fræðilegs efnis til almennings. Fyrir rúmum áratug var tekið til við að tilnefna tíu höfunda og bækur.  Sú leið var einnig farin nú og hlutu nokkrir sagnfræðingar auk þeirra Kristínar og Axels tilnefningu. Sagnfræðin blómstrar því mjög um þessar mundir.

Allar verða bækurnar kynntar fyrir almenningi kl. 15-17 laugardaginn 2. febrúar 2019 á Reykjavíkurtorgi í Grófinni. Viðurkenningin sem er vegleg peningaupphæð verður loks veitt við hátíðlega athöfn í Þjóðarbókhlöðunni í mars.